Ny fagleg leiar ved Skeivt arkiv

Ho kjem frå stillinga som prosjektkoordinator ved infrastrukturprosjektet SAMLA.

– Eg hadde følgt med på Skeivt arkiv ei stund. Kombinasjonen av nyinnsamling, dokumentasjon og inntak av eldre arkivmateriale er midt i kjerna av interessefeltet mitt, fortel ho.

Styrking

Tilsettinga er ei styrking av forskingsmiljøet ved Skeivt arkiv. Grønstad er kulturvitar med doktorgrad frå UiB og har særleg forska på kjønn og bytting av etternavn i parforhold.  

Frå fortid til notid

– Når Skeivt arkiv dokumenterer daglegliv gjennom videointervju og innsamling av skriftlege anonyme forteljingar, og gjer dette tilgjengeleg for ettertida i lag med eldre arkivsamlingar frå individ og organisasjonar, kan linjer trekkast frå fortida til notida, legg ho til.

Førre Grønstad fortel også at dei tilsette framsto som særs dyktige og at ho har fått det inntrykket stadfesta i dei vekene ho har vore i stillinga.

Samla

Hennar bakgrunn frå SAMLA er midt i blinken for arbeidet ved Skeivt arkiv. SAMLA har som føremål å digitalisere, gjere tilgjengeleg og bevare kjeldematerialet ved dei største kulturhistoriske tradisjonsarkiva: Norsk Folkeminnesamling (UiO), Norsk etnologisk gransking (Norsk Folkemuseum) og Etno-folkloristisk arkiv (UiB). (www.samla.no.)

Fagleg arkivarbeid

– 2022 har vore eit veldig aktivt år for Skeivt arkiv, og på kort sikt ser eg for meg at vi i 2023 får ro til å fokusere på innhaldet i arkivet vårt, og arbeidd arkivfagleg med dette. Innhaldet skal sjølvsagt gjerast tilgjengeleg, og publiserast når det er mogleg. Vidare er eg oppteken av at det er mykje vi enno ikkje har fått samla inn. Til dømes skulle vi gjerne hatt meir arkivmateriale og forteljingar frå organisasjonar og personar med minoritetsbakgrunnar eller funksjonsvariasjon og som skil seg ut frå majoritets-befolkninga på fleire måtar enn ved at dei er skeive.

Line Førre Grønstad har også bakgrunn frå kjønnsforskingsmiljøet ved UiB der ho framleis arbeider med etternamnsval i parforhold. I desember 2020 forsvarte ho doktorgradsavhandling om menn sine val av etternamn i parforhold. No utvidar ho emnet med skeivt og internasjonalt perspektiv.